Sipon - Paano ba ito Gagamutin?

Friday, December 25, 2009

Ngayong malamig ang panahon, usong uso na naman ang sipon at ubo. Paano ba ito magagamot?

Ang sagot: Walang gamot sa ubo.

Kusang itong nawawala sa katawan kapag malakas ang ating immune system. Ang tanging magagawa natin ay tulungan ang ating katawang maging malakas ang immune system.

Narito ang mga bagay na dapat tandaan ng isang taong may sipon.

1. Magpahinga. Kadalasan, ang taong may sipon ay madaling hingalin at bumibilis ang tibok ng puso. Ito ay natural na reaksyon ng katawan na nagpapahiwatig na kailangan ng mayos na pahinga. At ang pinakamainam na pahinga ay ang pagtulog.

Sa pamamagitan ng pagpapahinga, nailalaan ng ating katawan ang enerhiya sa paglaban sa sakit at hindi sa ibang gawain. Dahil dito, napapabilis ang paggaling ng katawan.

Kapag naramdaman nang sisipon ka, ipahinga na ang sarili sa loob ng isang araw. Habaan ang araw ng pagtulog at iwasang isipin ang trabaho. Mas mainam nang lumiban sa trabaho o eskwela sa loob ng isang araw kaysa lumiban sa loob ng isang linggo o mahigit pa kapag lumala ang sipon.

2. Uminom ng mas maraming tubig. Ang taong may sipon ay madali ring mauhaw. Huwag itong tiisin. Uminom ng hindi bababa sa sampung baso sa isang araw. Iwasan muna ang mga inuming matamis lalo na ang may caffeine kagaya ng softdrinks, kape, at energy drinks. Iwasan din muna ang gatas. Nasa baba ang dahilan kung bakit.

Mas mainam din na uminom ng puro at sariwang katas ng prutas gaya ng dalandan.

3. Kumain ng masustansyang pagkain. Ang taong may sipon ay kadalasang walang ganang kumain. Natural din itong reaksyon ng katawan upang mailaan ang enerhiya sa paglaban sa sakit at hindi sa pagtunaw ng pagkain. Kung hindi lang naman masustansya ang pagkain, mas mainam pang iwasan munang kumain at uminom na lamang ng tubig.

Para matulungan ang katawang labanan ang sipon, kailangan ng ating katawan ng masustansya at madaling matunaw na pagkain. Ito ay matatagpuan sa mga prutas na sagana sa katas at mga berdeng gulay. Mas sariwa mas mainam.

Mas mainam din na i-steam lamang ang gulay para mapanatili ang sustansya nito.

Iwasan ang mga pagkaing nagmumula sa hayop gaya ng karne, itlog, gatas, at keso. Bukod kasi sa mahirap itong tunawin, hindi rin mainam sa taong may sipon ang pagkaing mayaman sa protina. Kasi, ang sipon o mucus ay isang uri ng protina. Kung kakain pa ng pagkaing mayaman sa protina, maaaring lumala pa ang sipon at dumami ang mucus sa katawan na inilalabas bilang plema.

4. Mag-ingat sa pag-inom ng gamot. Hindi lahat ng gamot sa sipon ay totoong nakagagamot. Ang iba ay pinapakalma lamang ang ating katawan para hindi nating maramdaman ang mga sintomas ng sipon.

Isang gamot na dapat pag-ingatan ay ang antibiotics. Hindi lahat ng may sipon at ubo ay nangangailangan ng antibiotics. Ang antibiotics kasi ay para sa bacteria. Samantalang ang kadalasang sanhi ng sipon ay virus at allergy.

Kailangang sumangguni muna sa doktor bago gumamit ng antibiotics. Nirereseta lamang ito ng doktor kapag mayroong impeksyon ng bacteria ang taong may sipon.

5. Iwasan ang stress at ugaliing maging masayahin. Laughter is the best medecine, ika nga. Kapag masaya ang isang tao, tinutulungan niya ang kanyang immune system na maging matatag.

6. Gumamit ng halamang-gamot. Para sa akin, ang natural na mga gamot ang pangunahing lunas sa mga sakit. Ang mga synthetic naman ay pang-emergency o dagliang lunas.

Kapag may sipon, isa sa paborito ko ay ang aking ginagawang tsaa. Sa pag-inom ko nito, nararamdaman ko agad ang ginhawa kung nababara ang aking ilong at umuubo pa.

Para makagawa ng tinutukoy kong tsaa, kakailanganin ang sumusunod:

  • Isang baso ng inuming tubig
  • Isang hiwa ng luya na isang pulagada ang haba
  • Dalawang butil ng bawang
  • Dalawang kalamansi
At narito naman ang mga pamamaraan ng paghanda:
  1. Pakuluin ang tubig sa kawali o kaldero.
  2. Habang nagpapakulo, talupan ang luya, hiwain ng malilit at durugin. Ganun din ang gawin sa bawang pero huwag ihahalo ang dalawang sangkap.
  3. Hiwain at pigain ang kalamansi at ipunin ang katas sa isang tasa. Maaring tanggalin ang mga buto.
  4. Kapag kumulo na ang tubig, hinaan ang apoy hanggang sa mawala ang bula sa tubig at ilagay ang luya. Huwag itong tatakpan.
  5. Pakalipas ng sampung minuto, saka ilagay ang bawang.
  6. Pakalipas ng limang minuto patayin ang apoy. Handa na ang iyong tsaa. Salain ito at isalin sa tasa kasama ng kalamansi.
  7. Hayaan munang lumamig ng bahagya bago inumin.
Pinakamainam pa rin na umiwas sa mga gawaing magdudulot ng sipon gaya ng sobrang pagkain ng matatamis ay 'di masustansyang pagkain, palagiang pagpupuyat, at stress.

Read more...

Paano ba gumawa ng home-made na hamon?

Tuesday, December 22, 2009

Tuwing Pasko, kahit gusto nating magtipid sa gastos, pero gusto pa rin nating maging espesyal ang noche buena. Lalo pa't Pasko lamang ang araw na nagkakatipon ang marami sa mga pamilyang Pilipino sa loob ng isang taon.

At kapag noche buena ang pinag-uusapan, hindi mawawala ang tradisyonal na hamon o ham. Karamihan sa atin ay bumibili na lamang ng handa nang ihain sa oras ng noche buena. Pero sa mga gustong makatipid, mas gugustuhin nilang gumawa na lamang ng sariling hamon. Ngunit paano nga ba gumawa ng hamon sa bahay?

Narito ang mga kakailanganing sangkap. Sa kada limang kilong karneng baboy, kakailanganin ang:

1 tasang asin
3/4 tasang pulang asukal
1 kutsaritang cinnamon
1 kutsaritang pamintang durog

Haluin lamang sa isang lalagyan ang mga sangkap na ito. Kapag nahalo na ng mabuti, imasahe ito ng matagal sa ibabaw ng karne. Siguraduhing malagyan ang bawat bahagi ng karne.

Kung gustong madaling masipsip ng karne ang sangkap, magtabi ng kaunting sangkap, lagyan ng kaunting tubig at tunawin. Kapag natunaw na, kumuha ng bagong sterilized na syringe at iineksyon ang tinunaw na sangkap sa laman ng karne.

Pakatapos, ilagay ang karne sa loob ng isang plastik na lalagyang may mahigpit na takip. Ipasok ito sa ref at huwag bubuksan sa loob ng ilang araw. Kung naiineksyon ang sangkap sa karne, kailangang maghintay ng isang linggo para manuot ang sangkap sa karne. Pero kung hindi, kakailanganin ang dalawang linggong paghihintay.

Read more...

Paano nga ba ang proseso ng pagboto sa 2010 Elections?

Monday, December 21, 2009

Magiging una sa kasaysayan ng Pilipinas na magkaroon ng isang automated na halalan ang magaganap sa May 10, 2010. Ang napakalaking tanong ngayon ay kung papaano na ang paraan ng pagboto sa makabagong sistemang ito?

Dapat nga namang malaman ang sagot sa tanong na ito dahil isa sa pinakamalaking pagbabago ay ang pamamaraan ng pagboto. Maiiba na rin ang paraan ng pagbibilang ng mga boto. Dito ay ipapaliwanag ko ang mgaprosesong ito nang naayon sa mga panuntunang binalangkas ng Commission on Elections o COMELEC sa pamamagitan ng kanilang mga ipinakitang demo kasama ang Smartmatic TIM, ang kompanyang nakakuha ng kontrata upang gumawa ng mga makinang gagamitan sa araw ng halalan.

Ang partikular na makinang tinutukoy dito ay ang tinatawag na PCOS o ang Precint Count Optical Scan. Bawat isang presinto ay magkakaroon ng isang PCOS sa araw ng halalan. Narito ang larawan nito.


Nariyan pa rin sa presinto ang Board of Election Inspectors (BEI's) na binubuo ng Chairman, Poll Clerk, at Third Member, mga kinatawan ng election watchdogs na accredited ng COMELEC gaya ng NAMFREL at PPCRV, mga poll watchers ng mga kandidato at partido, at ang mga secrecy folders.

Ang PCOS ay mayroong electronic key (username at password) na tanging ang Chairman lamang ang nakakaalam.

Kagaya ng dati, pagdating ng isang botante sa polling center o lugar ng botohan, kailangang hanapin niya ang kanyang pangalan sa opisyal na listahan ng mga botante na nakapaskil sa mga pintuan ng mga polling precints. Kung saan niya nakita ang kanyang pangalan ay doon siya sa presintong iyon boboto.

Para mapadali ang paghanap ng kanyang records, kailangang tandaan niya ang numerong katabi ng kanyang pangalan at sasabihin niya ito sa BEI's pagpasok niya sa loob ng presinto. Kailangang i-verify ng BEI's ang pagkakakilanlan ng botante sa pamamagitan ng pagsangguni sa kanyang Registration Records. Maaaring hilingin ng BEI's na magpakita ng anumang valid ID ang isang botante para matiyak na ang pangalang nasa listahan ay ang mismong taong umaangkin nito.

Pagkatapos nito at bibigyan ang botante ng isang espesyal na balota at marker. Ang balota ay may numero na maaari lamang ibigay at gamitin ng isang partikular na botante.

Ang balota ay higit na mahaba at malapad kaysa sa mga balota noong nakaraang halalan. Ito ay kasinglapad ng isang regular na bond paper pero mas mahaba kaysa long-sized bond paper. Ito rin ay gawa sa matigas na papel na mayroong security features para hindi mapeke o madaya.

Matapos makuha ang balota at marker ay pupunta ang botante sa isang upuan na may ballot secrecy folder. Dito niya isasagawa ang aktwal na pagboto. Wala na ang hiwalay na listahan ng mga kandidato dahil nasa balota na mismo ang lahat ng mga pangalan ng mga kandidato mula sa pangulo hanggang sa lokal na konsehal.

Upang mabilang ang kanyang boto para sa isang kandidato, kailangan nyang markahan o i-shade ang oval na katabi ng pangalan ng kandidato gamit ang marker. Hindi na kailangang isulat ang pangalan ng kandidatong nais nyang iboto.

Sa pag-shade ay kinakailangang punuin ang oval para mabilang ang boto. Hindi maaring gamitin ang tsek (/), ekis (X), tuldok (.), o guhit (-)(|) sa pagmamarka ng oval sa balota. Hindi ito mababasa ng PCOS at hindi mabibilang ang boto.

Dapat din na tandaan na iisang balota lamang bawat botante ang nasa loob ng presinto. Sapat lamang ang bilang ng mga balota sa bilang ng mga rehistradong botatante sa isang presinto. Dahil dito, kailangang tiyakin ng botante na tama ang kanyang pagmarka para hindi masayang ang kanyang boto.

Isa pang dapat tandaan ay ang tinatawag na "overvote." Nagkakaroon ng "overvote" kung sobra sa hinihinging boto ang ginawa ng isang botante para sa isang posisyon.

Halimbawa: Isang pangalan lamang ang maaaring iboto sa pagkapangulo. Kapag higit sa isang pangalan ang minarkahan ng isang botante, ito ay "overvote" ang hindi mabibilang ang boto para sa naturang posisyon. Pero kung tama ang bilang ng kanyang boto sa mga senador, kongresista, gobernador, at iba pa, mabibilang pa rin ang mga ito. Ang ibig sabihin, ang pagkakamali sa pagboto sa isa o ilang posisyon ay hindi nangangahulugang pagkaimbalido ng buong balota. Ang mga tamang boto ay mabibilang pa rin.

Narito ang bilang ng mga botong hinihingi sa bawat posisyon:

  • Pangulo (President): isa (1)
  • Pangalawang Pangulo (Vice President): isa (1)
  • Mga Senador (Senators): labindalawa (12)
  • Kongresista (District Congressman): isa (1)
  • Gobernador (Provincial Governor): isa (1)
  • Bise-Gobernador (Vice Governor): isa (1)
  • Kinatawan sa Sangguniang Panlalawigan (Provincial Board Members): dalawa hanggang pito (2-7), bawat distrito depende kung saan nakarehistro ang botante
  • Alkalde (City or Municipal Mayor): isa (1)
  • Bise-alkalde (Vice Mayor): isa (1)
  • Mga Konsehal (City or Municipal Councilors): dalawa hanggang labindalawa (2-12), depende sa klasipikasyon ng isang bayan o lungsod
  • Party-list Representative: isa (1)

Sa mga posisyon kung saan maaaring higit sa isa ang iboto (Senador, Board Member, Councilor), maaaring mag-"undervote" ang isang botante. Ang "undervote" naman ay pagkakataong kulang sa hinihinging boto ang minarkahan ng botante. Halimbawa: Imbes na labindalawa (12), lima (5) lamang na kandidato sa pagka-senador ang nais niyang iboto, bibilangin pa rin ang kanyang mga boto pabor sa kandidatong kanyang minarkahan.

Pakatapos bumoto, dadalhin ng botante ang balota sa makina kung saan siya mismo ang magsusubo nito para ipasok sa loob ng makina. Isusubo niya ito ng pahaba. Maaaring ipasok ang balota kahit alin sa dalawang dulo ang mauna, nakataob o nakatihaya man ito. Kailangan lamang na maipasok ang dulong bahagi ng balota at hihigupin na ito ng makina.

Makikita sa loob kung naipasok na ang balota dahil transluscent ang chest ng makina. May indikasyon din sa maliit na screen sa bandang kanan kung naging matagumpay ang pagboto. Makikita rin sa makina kung ilan nang balota ang nabilang sa loob.

Bago lumabas ang botante, babalik siya sa BEI's para lumagda sa kanyang record at papatakan ng indelible ink ang kanyang kuko sa kanang hintuturo.

Pagkatapos ng itinalagang oras ng pagboboto para sa lahat ng mga botante, isasara na ang botohan. Gamit ang electronic key, mag-iiprenta na ng resulta ng botohan ang makina. Dito makikita ang bilang ng mga botong ng bawat kandidato. Ang bilang ng mga botong ito ay iyon lamang na nanggaling sa mga botante ng partikular n presitong iyon.

Bibigyan ng kopya ng resulta ang mga kintawan ng mga accredited na election watchdogs at mga partido. Ang resulta sa presinto ay kailangang maipadala ng charmain sa municipal board of canvassers. Ang pagpapadala nito ay sa pamamagitan ng satellite. Dahil dito, ilang oras lamang matapos ang botohan ay maari nang malaman kung sinu-sino ang mga nanalo sa isang bayan o lungsod.

Ang resulta naman mula sa mga munisipyo o lungsod ay ipapadadala sa provincial board of canvassers para malaman ang resulta ng botohan para sa buong lalawigan. Ang resulta sa lalawigan ang syang ipapadala naman sa national board of canvassers kung saan malalaman kung sino ang mananalo sa mga national na posisyon.

Dahil ito ang kauna-unahang pagkakataon na magaganap ang ganitong uri ng botohan at bilangan, asahan na natin ang ilang mga aberya ng sistema at kalituhan sa proseso. Pero hangga't napapanatili ang kasagraduhan ng bawat balota, ang proseso ng automation ay dapat na suportahan ng bawat Pilipinong naglalayong maging malinis ang halalan sa bansa.

Read more...

Paano ba maglaro ng FarmVille sa Facebook

Thursday, December 17, 2009

Ang FarmVille iy isang masaya at nakakaaliw na laro na nilikha ng Zynga at matatagpuan sa Facebook. Kung nag-eenjoy ka sa mga inter-active games, para sa'yo ang larong ito. Ang mga sumusunod ay ang mga panimulang hakbang upang makapaglaro ng FarmVille.

Una, kung may friend ka na sa Facebook na naglalaro ng FarmVille, i-click mo lang ang "Play FarmVille Now" na makikita sa kanyang post na may kinalaman sa FarmVille. Kung wala pa, kailangan mong mag-sign up sa Facebook gamit ang link na ito, http://apps.facebook.com/onthefarm/index.php.

Ikalawa, kailangan mong gumawa ng character na syang magiging farmer mo. Maaari mong i-customize ang iba't ibang katangian ng iyong farmer.

Pangatlo, bilang pasimula, mayroon kang 300 coins at anim na plots. Apat sa anim ng mga plots na ito ay may nakatanim nang mga binhi at bibigyan ka ng isang dagliang pagsasanay kung paano ang pag-ani ng mga pananim na maaari nang anihin. Para malaman kung handang nang anihin ang isang plot, itapat lamang ang mouse dito at malalaman mo na kung ito ay aanihin na o tumutubo pa lamang.

Pang-apat, kapag dapat nang anihin ang iyong pananim, i-click lamang ito at agad itong aanihin ng iyong farmer. Kapag natapat ang iyong mouse sa nakatiwangwang na plot, malalaman mo na ito ay isang "fallow land" at kailangang araruhin o i-plow sa pamamagitan ng pag-click dito. Ang pag-plow sa isang plot ay nagkakahalaga ng 15 coins at katumbas nito ay isang experience point o XP.

Kapag nag-click kang muli sa isang plowed plot, lalabas ang listahan ng mga binhing maaari mong itanim. Ang listahang ito ang tinatawag na pamilihan o market. Tiyakin na ang halaga at dami ng bibilhing binhi ay naayon sa halaga ng iyong coins. Mahalaga ring tandaan ang itatagal bago mo ito anihin.

Halimbawa, sa gabi bago matulog, iwasang magtanim ng strawberries na magtatagal lamang ng apat na oras bago maani. Dahil natutulog ka sa panahon ng ani, kinabukasan paggising mo tuyo na ang iyong pananim at hindi mo mababawi ang puhunan mo sa paghanda ng plot at pagbili ng binhi.

Panglima, para mapalawak ang lupang taniman, gamitin lamang ang plow tool para makagawa ng mas maraming plot. Ang mas malawak na taniman ay nangangahulugang mas malaki ang iyong pagkakataong mapalago ang iyong kita. Pakatapos mong mag-plow, maaari mong i-click muli ang plot para makapamili ng binhingnais mong itanim, o kaya i-click ang Market button sa iyong toolbar. Dito makikita ang mga pagpipilian at mga kakayahan mo sang-ayon sa'yong level.

Pang-anim, pansinin na may mga binhing maaari mo lamang bilhin kapag narating mo ang level na kailangan para dito. Para tumaas ang iyong level, kailangan mong madagdagan ang iyong XP.

Isa sa pinamasayang bahagi ng laro ay ang pagbibigay at pagtanggap ng mga regalo. Para magawa ang mga ito, kailangan mo munang magkaroon ng mga katabi o neighbors. Anyayahan lahat ng mga kaibigan mo sa Facebook na maging mga neighbor mo para magkaroon ka ng mas maraming pagkakataong makaipon ng mas maraming coins at XP.

Para makapagbigay ng regalo, i-click lamang ang "Free Gifts" sa itaas na bahagi ng screen. I-click ang regalong nais mong ibigay, i-click ang "Proceeed to Send" at piliin kung sino sa mga neighbors mo ang nais mong bigyan ng regalo. Ang uri ng regalong maaari mong ibigay ay ayon pa rin sa kasalukuyang level mo.

Upang magamit ang mga regalong ibinibigay sa'yo ng mga kaibigan mo, kailangan mo munang i-accept ang mga ito. Kapag may nagregalo sa'yo, makikita mo ang "Farmville Gift Request" sa taas at gawing kanan ng iyong Facebook homepage. I-click lamang ito upang makita ang regalong natannggap mo at kung galing kanino. Kapag na-accept na ang isang regalo ay makikita mo na ito sa imbakan ng mga regalo na makikita sa'yong Farmville toolbar.

Ngayong alam mo na ang mga panimulang hakbang, handa ka nang maglaro ng Farmville. Isang paalala lamang. Kapag maglalaro ka ng Farmville, tiyaking wala ka nang ibang mahalagang gagawin. Ito ay sapagkat lubhang nakakaaliw ang larong ito at maaaring lumipas ang ilang oras nang hindi mo namamalayan habang nakatutok sa iyong bukirin.

Tandaan lamang na kapag mas marami kang naitatanim, mas marami din ang maari mong anihin at palaki ng palaki halaga ng iyong coin at XP. Sa pamamagitan nito makakabili ka na ng mga palamuti, mga gusali, at maari mo ring palawakin ang iyong sakop na lupain sa sakahin.

Read more...

Paano ba mapapabilis ang mabagal na internet connection

Wednesday, December 16, 2009

Kung nababagalan ka sa internet connection mo, 'wag agad agad mawawalan ng pasensya. May mga paraan para mapabilis ito. Ang ilan sa mga sumusunod na mga kaparaan ay maaaring gawin agad, ang iba naman ay nangangailangan ng masusing pagbubutingting.

Una, maaari mong i-configure ang iyong browser para hindi ipalabas ang mga larawan, animations, tunog, video, at iba pang multi-media content. May mga browser din na sadyang ginawa para magpakita lamang ng mga text (text-based browers). Maaari mo lamang gamitin ang paraang ito kung text lamang ang pakay mo sa isang webpage.

Pangalawa, gumamit ng internet sa mga oras na kaunti ang ibang gumagamit. Kalimitang marami ang nagsu-surf ng iternet kapag weekend at sa gabi.

Pangatlo, gawing mabisa ang paggamit ng iyong cache storage. Ang "cache" ay ang lugar kung saan iniimbak ng iyong computer ang mga impormasyon tungkol sa mga binisita mong websites. Maaring nangangailangang i-resize mo ang iyong cache o kaya'y linisin ito ng mas madalas. Hanapin sa menu ng iyong browser ang item na may pangalang Cache o kaya Temporary Internet Files at mga katulad na items.

Pang-apat, maaari mong i-upgrade ang iyong mong modem. Sa ngayon, ang mga modem na 56.6 kbps ang pinakamabilis na telephone modem.

Panglima, magkonsulta sa iyong Internet Service Provider para matiyak na tama ang pagkaka-configure ng iyong modem.

Pang-anim, maaari mong palitan ang iyong modem ng mas mabibilis na uri gaya ng wave, ISDN, DSL, satellite, cable, at iba pa.

May mga lugar na walang cable, ISDN, at DSL connection. Kung available ang mga ito, kalimitang mas mahal ang iyong babayaran kaysa sa telephone modem.

Read more...

Paano ba makakatipid sa sabon, toothpaste, at shampoo

Saturday, October 24, 2009

Ngayong patuloy na nagmamahal ang bilihin, mahalaga ang pagtitipid sa lahat ng bagay. Kahit mga ordinaryo kagaya ng sabon, shampoo, at toothpaste ay kailangang matuto tayo ng tamang pagtitipid sa mga ito lalo pa't araw-araw nating ginagamit ang mga ito.

Simulan natin sa sabon (pampaligo nga pala ang tinutukoy ko). Mas makakatipid kung gagamit ka ng bimpo sa paliligo. Sabunin ang bimpo pakatapos basain ang buong katawan. Gamitin ang sinabong bimpo para kuskusin ang iyong balat. Sa ganitong paraan, hindi mabababad ang sabon kaya mas matagal itong matunaw.

At kapag maliit na ang sabon, yung malapit nang maputol sa sobrang nipis na, huwag mo nang gamitin. Kasi kapag ginamit mo pa tapos naputol habang ikinikiskis mo sa balat mo, ang tendency ay hahayaan mo na lang itong anurin ng tubig. Sayang.

Huwag ding itatapon ang manipis na sabon. Lalong masasayang. Sa halip, bumili ka na ng bagong sabon. Kadalasan naman kung ano ang ginagamit mong sabon yun at yun din ang bibilhin mo sa susunod. Kapag nabuksan mo na ang bagong sabon, kunin mo yung tirang sabon at basain ng konti. Pakatapos basain ng konti, idikit ito sa bagong sabon. Sa ganitong paraan, magagamit mo pa ang tira mong sabon. Tipid, hindi ba?

Para naman sa toothpaste at shampoo, magkaparehong paraan ang ihahayag ko dito.

Kung gagamit ng shampoo at toothpaste, Kumuha muna ng konti, mga kalahati ng regular mong gamit, o mas konti pa. Yun lang muna ang gamitin mo. Hayaan mo lang kung hindi masyadong bumula.

Pakatapos, magmumog ng isang beses kung nagsisipilyo, o banlawan ng konti ang buhok kung naliligo. Pakatapos, kumuha ulit ng konting shampoo o toothpaste. Maaring kasing-dami ng una mong kinuha o mas konti pa. Mag-toothbrush o mag-shampoo ulit.

Sa pagkakataong ito, magiging mabula na sila at magiging mas malinis ang iyong pakiramdam. Mas matipid ito kaysa kukuha ka agad ng marami. Pakatapos mong mag-shampoo o mag-toothbrush pakiramdam mo hindi gaanong nalinis ang mga ngipin o buhok mo, uulitin mo ang pagsepilyo at pag-shampoo. Sayang. Dapat magtipid.

Read more...

Paano ba ang pagpigil sa sinok?

Friday, September 25, 2009

Namamasdan ko kasi ang anak ko na one-month old pa lang ngayon na medyo madalas suminok. Hindi naman ako nababahala kasi alam ko normal lang sa sanggol ang madalas na pagsinok.

Kaya lang minsan, hindi siya nakakatulog kaagad dahil sa pagsinok. Gusto ko sanang turuan siya kung paano pipigilan ang kanyang pagsinok pero napakabata pa niya para maintindihan ako.

Kaya dito ko nalang ituturo ang tamang paraan para mawala ang sinok.

Noong maliit pa ako, may mga paraan na itinuturo sa akin para mawala ang aking sinok. Pinaiinom ako ng maraming tubig, pinakakain ako ng saging, pinahihinga ako sa loob ng supot, at minsan ginugulat din ako.

May mga pagkakataong nawawala nga ang sinok ko sa mga paraang nabanggit, may mga pagkakataon naman na hindi nawawala kahit punong-puno ng tubig at saging ang tyan ko, o malabo na ang plastic dahil sa hininga ko, o kahit namutla na ako sa sobrang gulat.

Sa mga pagkakataong nawawala ang sinok ko, pinag-aralan ko kung bakit nga ba nawawala ito. Ano ang factor sa mga paraang nabanggit na siyang nagiging dahilan sa pagkawala ng sinok ko?

At heto ang aking naging findings. Wala pa akong scientific explanation nito pero napatunayan kong mabisa itong pangtanggal ng sinok.

Ito ay walang iba kundi ang simpleng pagpigil sa hininga ng mga ilang segundo. Pero hindi lang basta pagpigil sa hininga. Narito ang tamang paraan:

Unang dapat tandaan, pinakamabisa ang paraang ito kung nararamdaman mong sisinukin ka dahil hindi mo kailangang pigilin ang hininga mo ng mas matagal.

Kapag naramdaman mong suminok ka, huminga ng ubod ng lalim. Ibuka ang bibig at langhapin lahat ng hanging kaya mong ipasok hanggang sa pinakailalim ng bituka mo.

Pakatapos, pigilan itong lumabas muli sa lalamunan mo habang iniipit sa loob ng katawan mo hanggang maramdaman mong parang sasabog ang dibdib at mga ugat mo sa leeg. Bumilang hanggang sampu bago dahan dahang pakawalan ang hangin.

Kapag suminok ka pa rin matapos gawin ito, ulitin lang ang ito at pigilin ang pagbuga ng hangin ng mas matagal (mga 12 na bilang).

Read more...

  © Blogger template Writer's Blog by Ourblogtemplates.com 2008

Back to TOP